اثريه ثقافيه

12 مايو، 2010

معدن الذهب في مصر القديمه


ياهلا .... كيفكم يارب تكونوا بخير ... عوده بعد فتره قصيره أهون ومتأخرتش عليكوا كالعاده... وانا بعمل واحد من أبحاثي الخنيقه اللي مغلباني كنت شغاله في الذهب .....آه المعدن الغالي ده.....بجد بجد ذهلت من دماغ المصري القديم ده .....إيه الدماغ دي مش ممكن ....بس نرجع ونقول بردوا لا عجب في ذلك علي أصحاب أعظم حضاره في العالم .....أكيد ناس كتير متعرفش الذهب إللي كلنا عاريفنوا ده بيجي منين أو بيتصنع إزاي يعني أبرز حاجه ممكن نتصورها هي سبيكه من الذهب ، بس ياتري إحنا نعرف السبيكه دي وصلت لنا إزاي إتصنعت إزاي ، ياتري المصري القديم ده الإنسان البدائي الأول ده كان بيلاقي السبيكه كده يقوم يخدها ويصنع منها أروع وأجمل وأرق حلي ذهبيه في العالم ......وتشهد المتاحف علي ذلك .....معقول .... أكيد ده أمه دعيالوا إللي يلاقي سبيكه وخصوصا اليومين دول.....بس ده إستحاله طب ما تيجي نعرف قصه الذهب ده ونعرف أكتر عنه وإزاي المصري القديم المفرعن ده كان بيحصل عليه إزاي ؟؟ وبيتجاب منين؟؟وياتري قدر يدخل فيه معادن تانيه!!! وقدر كمان يعطي للذهب ألون تانيه !!! يلا بينا نعرف أكتر .......أكيد نفسكوا تعرفوا المصري القديم ده صنعوا إزاي وخصوصا بعد ماشاف معظمنا الحلي الذهبيه إللي صناعها المصري القديم في المتحف المصري وغيره ودقته في تشكيلها من الذهب


الذهب


الذهب ده واحد من المعادن النفيسه اللي كانت بتتصدر قائمه المعادن اللي إستخدمها المصري القديم بصفه أساسيه ومازال طبعا في صياغه الحلي ، وعرفوا من زمان قوي من عصر ماقبل الاسرات تقريبا منذ عصر حضاره نقاده الثانيه ، وفي الغالب لا يوجد نقي أبدا لانه بيحتوي علي نسبه من الفضه أوالنحاس أو الحديد .
مصدر الذهب
الذهب ده كان بيوجد في عروق من حجر الكوارتز أو مختلطا بالرمال والحصي اللي كانت بتنحتها المياه من الصخور وكانت في الغالب بتتجمع بفعل تيار المياه في مناطق بعينها وكان المصري القديم في الحاله دي كان بيحصل علي الذهب بغسل الرمل والحصي وغيرها بتيار من الماء عشان يبعد المواد الخفيفه ذي الرمل ويبقي فاضل عنده المواد الثقيله بس وإللي كان من بينها الذهب ويخده ويجمعه وبعدين يصهره علشان يقدر يستخدمهأما بالنسبه لإستخراج الذهب من صخور الكوارتز فكان بيقوم بقطع عروق الذهب من قطعه الصخر المحيطه بها من الجبل وبعد ما يخدها يكسرها إلي قطع صغيره في أواني حجريه كبيره وبعدين يصحنها بالرحي اليدويه لغايه ما تبقي مسحوق ناعم خالص وبعد كده يحطها علي سطح مائل ويمرر فوقه تيار من الماء علشان يفصل ذرات الذهب منه وبعد كده يجمعها ويصهرها شوفتوا دماغ المصري القديم بقي

أماكن إستخراجه .
الذهب ده بيكثر في الأراضي المصريه بين وادي النيل والبحر الأحمر بصفه خاصه في المنطقه إللي بيحدها شمالا طريق فنار القصير وتحدها جنوبا حدود السودان وأخصها مناطق كوش القديمه ، ولم يعثر علي الذهب في شبه جزيره سيناء وعلي فكره المصرين القدماء كانوا من أمهر الباحثين عن الذهب وده لإن لم تكتشف أيه رواسب يمكن إستغلالها إلا وقد إكتشفوها يقدرا يستخروجوا منها الذهب.
صياغه الذهب.
برع الصناع المصريون المفرعنين دول براعه منقطعه النظير في إستعمال الذهب وإحتل الذهب ده المكانه الأولي في صياغه الحلي في مصر القديمه والسبب في البراعه دي وجود الذهب في الأراضي المصريه وسهوله الحصول عليه وتجهيزه بطريقه سهله نسبيا عن غيره من باقي المعادن التانيه ، غير كده عدم قابليته للتآكل أو التلف ومبيفقدش بريقه ولمعانه ورونقه بكثره الإستعمال، وفعلا بيظهر ده من خلال ما حفظ من بعض آثار ذهبيه فالمهاره إللي إمتاز بها الصياغ المصيرون من خلال تلك الآثار الذهبيه بتؤكد لنا إن صياغه الذهب و إستعماله دلوقتي ما بتفرقش كتير عن الصياغه المصريه القديمه في تفاصيل بسيطه جدا ظهرت بس بسبب التطور والتجارب عبر العصور الطويله ، وكان الذهب يصاغ إما بالطرق أو أو بطريقه الصب في قوالب يصهره ويصبه في قوالب وإستطاعوا أيضا حفره والنقش عليه ، وساعات كان الصناع بيحولوه إلي صفائح رفيعه علشان يكسوا بها التوابيت و الموائد وفي الحاله دي كانوا بيثبتوها بمسامير من الذهب أو بماده لاصقه إذا كان الصفائح دي رقيقه جدا ومتحتملش مسامير وإستطاع الكيميائيون انهم يثبتوا وجود بياض البيض بين هذه المواد اللاصقه.

‏التطعيم بالذهب


كمان المصري القديم أنه يتطعم النحاس والفضه بالذهب وده كان بيتم عن طريق وضع ألواح ذهبيه علي المعدن المطلوب طرقه أو تثبيتها بماده لاصقه ربما كانت صمغ أو غرا

تلوين الذهب.

من أبرز مميزات الذهب المصري القديم هو تنوع ألوانه فكان منه الأصفر البراق وده كان بيبقي نقي تقريبا ، والأصفر الشاحب أو المعتم وده كان في الغالب كان بيحتوي علي نسبه من الفضه والنحاس وإللي بتتأكسد بتعرضها للجو ، والبني المائل للحمره وده كان بيحتوي علي نسبه من النحاس والحديد ، والأحمر بدرجاته وإللي أرجعه الكيمايئين سببه هو تلوث الذهب بالمواد العضويه .


شوفتوابقي مدي براعه المصري القديم واد إيه دماغه حلوه وعرف يعلم البشريه إزاي يصيغ الذهب والجديد بالذكر أيضان إن المصريون القدماء أعتبروا الذهب من أثمن المواد وما كانتش قيمته بس في الإعتبارات الإقتصاديه البحته إنه غالي وكده لا ده علشان ماده الشمس والمعدن إللي إنبعثت منه الآلهه.



تصبحوا على خير بقى
اتمنى انه يعجبكوا هستنى تعليقتكوا
سلام



















هناك 11 تعليقًا:

Dr.el-shafey يقول...

مقال من ذهب...تسلم إديكي يا زئردة

حزنبل وعياله الاربعه (شكولاتس وخوخه وزئرده وميرو) يقول...

اشمعنه زئرده يعنى
ولا علشان مأموصه
زئرده مش بترضى على حد ومش مكفيها ده زئرده عاوزه خروف

غير معرف يقول...

حلوه قوي وسهل وبسيط وفيه معلومات قيمه

حزنبل وعياله الاربعه (شكولاتس وخوخه وزئرده وميرو) يقول...

ربنا يبارك فيك
دعواتك

سمكه يقول...

حلو قوي الموضوع ده دايما متجدده ف موضوعاتك من حيث الشكل والمضمون,يارب تخلصي بقي ابحاثك دي ع خير وتفضي ليا انا حاسه ان انا اللي بعمل الأبحاث دي,انا تعبت لك سلف ياتوته ريحي نفسك شويه نفسي اخرج معاكي ولا يوم من ايام زمان ,قول للزمان ارجع يازمان
سمكه

حزنبل وعياله الاربعه (شكولاتس وخوخه وزئرده وميرو) يقول...

حرام عليكي يامفتريه إن كان علي أبحاثي أولع فيها بس نخرج فاكره يابطه التمر هندي و طاجن المكرونه بالبشاميل والحاجه العجيبه إللي شربناها من عند الرشيدي وضحكي بصوتي عالي وتقوليلي بس إحنا في الشارع ياه علي رأيك قول الزمان إرجع يازمان

maia يقول...

السلام عليكم
عاملين ايه
الموضوع جميل وسهل والموضوعات القديمة ممتازة
انا مايا من المعجم الفرعوني وعايزة اراسلك ومش عارفة
ده اميل المدونة ياريت تراسليني عليه
nefertari.egyptian2@gmail.com

prof m.z يقول...

مقال رائع ومعلوماته قيمة وجديدة
شكرا لكى و بالتوفيق دائما

حزنبل وعياله الاربعه (شكولاتس وخوخه وزئرده وميرو) يقول...

انا بشكرك جدا يامايا على تعليقك الرائع الذى أسعدنى كثيرا ، ومدونه المعجم الفرعونى مدونه رائعه وعملاقه واتمنى فعلا ان اراسلك وبعتذر عن تأخيرى فى الرد لانى لم أطرق باب مدونتى منذ شهرين لانشغالى عنها

Kawthar Y. يقول...

يعطيك ألف عافية عالموضوع الحلو
حلو وغني بالمعلومات وحليتيه أكتر لما كتبتيه باللهجة المصرية
تقبلي مروري ^_^

حزنبل وعياله الاربعه (شكولاتس وخوخه وزئرده وميرو) يقول...

ميرسى كتيررررررررررر على مرورك تعليقك اسعدنى جدا ومشجعنى جدا على كتابه موضوع جديد ادعيلى اتمنى ان اشوف تعليقاتك على باقى الموضوعات هيفتح نفسى جدا
اتمنى انها حقيقى تعجبك