اثريه ثقافيه

29 ديسمبر 2009

الخط الهيروغليفى







تعرفنا عن مفهوم اللغه اكيد حابين تعرفوا اكتر عن خطوطها وخليكوا فاكرين كويس قوى الحته دى خطوطها وليس لغتها عشان فى ناس كتير بتخطأ وبيقولوا عليها لغه طب ازاى واللغه ماهى الا عباره عن خطوط مانيجوا كده معايا نتعرف على خطوطها ونشوف بجد هى طلاسم بجد ولا ايه نظامه ولا دى لغه شيقه جدا تدعوا للاهتمام ومعرفه المزيد عنها.
قدرنا من خلال الاثار التى عثرنا عليها ان احنا نعرف ان اللغه المصريه القديمه دى كتبت بأربع خطوط مختلفه وهى " الهيروغليفيه، الهيراطيقيه ، الديموطيقيه،القبطيه " متتخضوش كده الخطوط دى كلها مظهرتش مره واحده،دى ظهرت فى ازمنه مختلفه على مدار تاريخ الحضاره المصريه ، اكيد نفسكوا تعرفوا ليه المصرى القديم مكتفاش بخط واحد وريحنا وخلاص..... والله ما متعب بالعكس هتعجبكوا دماغ المصرى القديم ده لما تعرفوا السبب ،عايزين تعرفوا ليه طبعا ، شكلى انا كده متعبه.....الراجل المصرى القديم ده يا جماعه من الاخر دماغ كان كل ماحياته تتطور وتتقدم كان بيدور على اللى يساعده عشان يتقدم ويواكب عصره .... طب شوفوا كده عصرنا دلوقتى هنلاقى ميت حاجه علشان نقدر نبتكر ونطور ونتقدم ديما نبحث عن اللى يساعدنا عشان ننجز بسرعه فاكريين الجوابات زمان دلوقتى بتكه واحد من على الكومبيوتر بتاعك تقدر تبعت ايميل الى اى مكان فى العالم والعمليه دى لا تستغرق الا ثوانى معدوده...... يعنى حلو ان الانسان يطور من نفسه ويواكب عصره وده اللى عمله المصرى القديم..... يعنى المصرى القديم ده كان عنده دماغ حلوه بردو كل ماحياته تتطور كان بيحب يضيف على حضارته المزيد ويواكب عصره، المره دى هكلمكوا عن الخط الهيروغليفى وهستكمل حديثى عن باقى الخطوط على أجزاء ان شاء الله.




الخط الهيروغليفى
يعتبر الخط الهيروغليفى اولى الخطوط التى كتب بها المصرى القديم لغته، وعلى فكره الباحثون وعلماء المصريات بيأكدوا ان الهيروغليفيه هى اصل لغات العالم كله ماعدا ابجديات شرق اسيا.
وكلمه هيروغليفى دى تعنى حرفيا " الكتابه المقدسه " طبعا هتسألوا ليه عرفت بالمعنى ده......... انا هجاوبكم لان الكتابه دى كانت تكتب على جدران الاماكن المقدسه ذى المعابد المقابر، وكمان كان لبها اسم تانى تقدروا تقولوا اسم الدلع بتاعها اللى هو" الكتابه المنقوشه " لان الخط ده كان المصرى القديم كان بينفذه بأسلوب نقش بارز او غائر على جدران الاثار سواء الثابته " اللى هى مبتتحركش ولا يمكن نقلها
مثل المعابد ، او اللاثار المنقوله "اى التى يمكن نقلها من مكان لاخر "زر التماثيل ، الصلايات او اللوحات" معنى كده ان الهيروغليفيه دى كان لبها معنيين الاول " الكتابه المقدسه" والتانى كان "الكتابه المنقوشه " ذى حسن و أبو على كده.
اما كلمه هيروغليفى دى نفسها اشتقت من الكلمتين اليونانيتين " هيروس" ، وجلفوس" بس ده بعد كده فى الحضاره اللى جات بعد الحضاره المصريه خليكوا فاكرين بردوا ان احنا بلغتنا دى نقدر نثبت ان الحضاره اليونانيه دى جات بعدنا ودى حقائق ثابته مش محتاجه نقاش " يعنى نقدر نقول ان هما قلبةها بلغتهم اليونانيه وسموها كده ليس اكتر" ذى مثلا يلعب بالعربى ، اتغيرت فى الانجليزى وبقت PLAY




شكلها
الكتابه الهيروغليفيه دى كانت بتتكون من مجموعه من النقوش استمدت هذه النقوش من البيئه المصريه اى كانت كتابه تصويريه بالاضافه الى جانب وجود حروف نحو 24 حرفا ، بمعنى انها كانت مصوره تتكون من صور لاشكال معينه مضاف اليها بعض الرموز للتعبير غن العناصر الصوتيه
اسنخدماته
استخدم المصرى القديم الخط الهيروغليفى الخط ده لتقش النصوص الدينيه على جدران القصور والمعابد والمقابر واسطح التماثيل والالواح الحجريه المنقوشه والالواح الخشبيه الملونه وكان بيعتبره تسجيل وفننا زخرفيا لهذا برع فى نقشها لدرجه تخليك تقول ايه ده مش ممكن تطلع من تحت ايا رسام ابد ولا نقاش ولا حد فى زمنا ده يقدر يقلدها ......... بصراحه كانوا ناس ناس يعنى بتشتغل وبذمه قوى شوفوا المنظر ده


كيف تكتب وتقرأ
يعد نظام الكتابه الهيروغليفيه نظام مرن جدا يكمن ان يكتب من على اليمين او من على اليسار او من اعلى الى اسفل او من اسفل الى اعلى وتقدر تعرف السطر بيبتدى منين من خلال اتجاه العلامه.
ظهرت وانتهت امتى
تشير الدلائل الاثريه الى ان المصريون القدماء عرفوا الكتابه الهيروغليفيه فى عصور ما قبل التاريخ وظلت هذه الكتابه سائده لفتره طويله تزيد لأربعه الاف سنه اى انها اقدم الخطوط التى استخدمها الانسان فى الكتابه.

العلامات الهيروغليفيه
انقسمت العلامات الهيروغليفيه الى قسمين:
علامات صوتيه ودى بتعطى قيمه صوتيه لحرف واحدوالتى تعرف تجاوزا بالابجديه
وعلامات تصوريه استخدم فيها صور من بيئته علشان يقدر يعبر عن فكرته وكان بيتبعها بعلامه قائمه علشان يأكد معناها
ومن هنا يمكن القول بأن الخط الهيروغليفى من اقدم الخطوط المصريه القديمه ، وبالتالى هو اصل لمعظم لغات العالم ، وعشان كده عمر ما التاريخ هيقدر ينسى فضل المصريين القدماء دول غلى الانسانيه كلها فى معرفه واختراع اللغه .
اتمنى ان يعجبكوا وياريت تدونوا تعليقاتكم علشاتن استمر

هناك 4 تعليقات:

د.محمد الشافعي يقول...

مين اللي بيقول إن الهيروغليفية هي أصل لغات العالم؟؟؟

حزنبل وعياله الاربعه (شكولاتس وخوخه وزئرده وميرو) يقول...

سؤال جميل جدا ؟؟؟؟ ولكن الاراء مازالت متناقضه فى هذا الصدد ولكن كل ما استطيع قوله هو ان الخط الهيروغليفى هو اقدم الخطوط التى كتب المصرى القديم بها لغته، حيث ثبت ذلك بالادله الاثريه القاطعه التى ترجع لفترات موغله فى القدم وقد لجأ المصرى القديم فى بعض المراحل الزمنيه الى تبسيطه وتمثل فى ذلك الخط الهيراطيقى ، ثم لجا الى تبسيط اخر له فى مرحله تاليه وتمثل فى ذلك الخط الديموطيقى ومن المحتمل ان اللغه المصريه بخطوطها اخذت طريقها نحو الانتشار بعد اتساع الدوله مع حركات التبادل التجارى التى حدثت مع البلاد المجاوره لهاويبدو انه بتناقل اللغه من مكان لاخر اصبحت الهيروغليفيه هى اصل لمعظم لغات العالم بمعنى تعدد الشكل والاصل واحد بحيث استفادوا من الاساسيات الرئيسه للغه

فاطمه يقول...

هايل الموضوع روعه وممتع جدا

حزنبل وعياله الاربعه (شكولاتس وخوخه وزئرده وميرو) يقول...

إزيك يابطوط والله وحشاني جدا إبقي طمنيني عليك ربنا يوفقك ياجميل وشكرا ليكي لتشريفك مدونتي