اثريه ثقافيه

3 أبريل، 2010

شم النسيم فرعونى الأصل .

كل سنه وانتو طيبين.........بصراحه كنت ناويه اتكلم عن طقوس الدفن لكن قولت بلاش غم بقى ونظقطط شويه ....و زى ما انتوا عارفين  ان انا متعودتش افوت مناسبه من غير ماقولك اصلها وخصوصا لما تبقى كده فرعونيه ...غير انكم بتوحشونى وقولت اعيد معاكوا ونقول بردوا لاخوانا المسيحيين كل سنه وانتو طيبين .....وكمان نعرف اكتر عن "شم النسيم " اللى كان واحد من أعياد مصر الفرعونية ....واللى كان ييرجع بدايه الاحتفال به إلى ما يقرب من خمسة آلاف عام تقريبا  إلى أواخر الأسرة الثالثة الفرعونية وبعض المؤريخين قالوا انه بيرجع لاقدم من كده لعصر ماقبل الاسرات كده........لكن المهم ان عيد شم النسيم  ده كان ولايزال عيدا للطبيعه والربيع  ظهر من عهد قدماء المصريين ولسه لغايه دلوقتى ...........ياترى ايه قصه العيد ده ؟؟؟؟؟وسبب تسميته كده؟؟؟؟وايه مظاهر الاحتفال بيه ؟؟؟؟ياترى كان فى فسيخ وبصل وحاجات كده ؟؟؟طب ماتيجوا نعرف اصله من باب العلم بالشىء.......
تسميته.
الفراعنه المفرعنين دول اطلقوا على العيد ده اسم " عيد شموش" واللى معناه بعث الحياه من جديد ، عشان كان العيد ده كل شىء فى الارض يبعث فيه الحياه من جديد فيتجدد النبات وينشط الحيوان لتجديد النوع ، ذى ما تقولوا كده بدايه خلق جديد فى الطبيعه ، وعشان كانوا بيحتفلوا بهذا العيد فى فصل الحصاد ، فحرف الاسم الى "شمو" وبعد كده حرف على مر الزمن ، الى "شم" تقريبا كده فى العصر القبطى ، وأضافوا ليها كلمه النسيم لاعتدال الجو فى هذا الوقت  والى نسمه الربيع   التى تعلن وصوله .

ميعاده.
المصريون القدماء اعتادوا انهم  يحددوا سنتهم الشمسيه وده كان طبعا تابع لظواهر فلكيه استطاعوا  رصدها ، وكانت السنه عندهم بتبدأ بعد اكتمال البدر الذى يقع عند الانقلاب الربيعي اللى هو اليوم الذي يتساوى فيه الليل والنهار،( اللى كان وقت حلول الشمس في برج الحمل ويقع فى يوم 25 برهمات ).وكانوا بيتصوروا ان اليوم ده هو بدايه خلق العالم الذى اعتبروه اول الزمان ،وده معناه انهم كانوا بيحتفلوا بعيد الربيع  عند الانقلاب الربيعي،
الاحتفال به.
كان المصريون القدماء  يحتفلون بعيد الربيع و كانوا بينتظروا ليلته، ليله العيد بقى  ، عارفين انتوا يوم رؤيه عيد الفطر دى نبقى مستنين المفتى علشان يقولنا العيد بكره او المتتم وده ديما بيبقى بعد تقرير الارصاد الفلكيه هما كمان بيقوا مستنين ليله الرؤيا دى  فكانوا يروحوا  يجتمعوا أمام الواجهة الشمالية للهرم قبل الغروب بشويه عشان يشوفوا غروب الشمس، فيظهر قرص الشمس وهو يميل نحو الغروب لغايه ما يوصل من قمة الهرم وكأنه يجلس فوق قمة الهرم.وفي  اللحظة دى  يحدث شيء عجيب وغريب جدا، بيلاقوا اشعه الشمس  تخترق قمة الهرم، فتظهر واجهة الهرم وكانها انشطرت إلى قسمين، وبعدها تبدأ الاحتفالات الدينيه ، وفى اليوم التالى يحتفلون به احتفالا شعبيا يشترك فيه جميع طبقات الشعب من الفرعون للفقير ويخرج الناس الى الحدائق والمتنزهات والحقول ويستنشقون رائحه الزهور ويستمتعون  بالورود وينسون فى هذا اليوم متاعيب الحياه وهمومها ، وكانوا يحملون معهم طعامهم وشرابهم ، ويركبون الزوارق الخفيفه على صفحه النيل ، ويروقوا ويهيصوا بقى ويغنوا على انغام الناى والمزمار ويرقصوا ويصفقوا ويقضوا يومهم فى لهو ومرح وسرور .
أطعمة هذا العيد:
من احب الاطعمه لديهم فى هذا اليوم
1-"البيض" (  وبدأ ظهور البيض  مع بداية العيد الفرعوني نفسه أو عيد الخلق حيث كان البيض يرمز إلى خلق الحياة زى  ما جاء  في متون كتاب الموتى وأناشيد (أخناتون الفرعوني).عشان كده كان بيبدأ  الاحتفال بأكل البيض كانوع من الشعائر المقدسة التي ترمز لعيد الخلق،
أما فكرة نقش البيض وزخرفته، فقد ارتبطت بعقيدة قديمة حيث كان الفراعنة ينقشون على البيض الدعوات والأمنيات ويجمعونه أو يعلقونه في أشجار الحدائق حتى تتلقى بركات نور الإله عند شروقه)
2-السمك المملح ( نقل لنا هيردودت عنهم انهم كانوا يأكلون السمك ويجففونه بعضه فى الشمس يأكلونه نيئا ويجففون بعضه الاخر فى ملح ، معنى ده انهم علرفوا الملوحه والفسبخ ، كانوا بيشوفوا ان اكلها مفيد جدا أثناء تغير الفصول )
3-البصل(فقد عثر على بعض النقوش التى كانت تشير الى تقديسه ، وكانوا يعلقونه حول اعناقهم ، او فوق اسره نومهم ثم يشمونه فى الصباع الباكر ، وكانوا يعلقونه على ابواب بيوتهم ، لانهم كانوا بيعتقدوا فيه انه يطرد الامراض ،وكان يؤكل اخضر مع البيض والفسيخ ،لانهم اعتقدوا انه يفيدد فى هذا الفصل من السنه ) 
4-الخس ( وقد اجمع العلماء على ان الخص البلدى يحتوى على ماده زيتيه تجلب الخصب والقوه والحيويه ، وعشان كده وصل عندهم انهم قدسوه وخصصوا له " الاله مين"
5-الملانه (وكانوا يعتبرون نضج الثمرة وامتلاءها إعلاناً عن ميلاد الربيع، وهو ما أخذ منه اسم الملانة أو الملآنة.وكانت الفتيات يصنعن من حبات الملانة الخضراء عقوداً، وأساور يتزين بها في الاحتفالات بالعيد).
 6-ولحم الاوز المشوى .
سر ارتباط شم النسيم بعيد الفصح اليهودى وعيد القيامه .
عيد شم النسيم من أعياد الفراعنة، ثم نقله عنهم بنو إسرائيل لان بنى اسرائيل حين خرجوا من مصر فى عهد موسى عليه السلام  كان اليوم ده بيوافق موعد احتفال المصريين ببدأ الخلق وأول الربيع واعتبروه رأس السنه بتاعتهم وسموا يوم خروجهم " الفصح" وهى كلمه عبريه من فصح او "فسخ" بمعنى اجتاز او عبر ، ثم انتقل إلى الأقباط بعد ذلك، عشان كان بيوافق موعد قيامه المسيح ، ولما انتشرت المسيحيه فى مصر اصبح عيدهم يلازم عيد المصريين القدماء ويقع دئما يوم الاثنين  وصار في العصر الحاضر عيداً شعبياً يحتفل به كثير من أهل مصر من أقباط ومسلمين وغيرهم.
كنت عاوزه اقول ان عيد شم النسم كان ولا يزال عيدا للطبيعه والربيع قائما من ايام الفراعنه حتى اليوم ، وجميع الاديان اللى اعتنقها المصريون اعتبرته عيدا قوميا يحتفل به المصريين على اختلاف طبقاتهم وديانتهم ، ويخرجون ويأكلون كما كان الفراعنه يفعلون .......

ياترى ياحزنبل اخبار الفسيخ معاك ايه........انا عارفه ان كاره السمك اليومين دووووووووووول .....هتاكلوا ولا ايه ...فاكر تدبيسه الفسيخ بتاعت يوم عيد الفطر .. وقعدت تدعى عليا

هناك 6 تعليقات:

حزنبل يقول...

رائع والله...مجهود رائع...وحاسس إنك بتحبي مصر القديمة والحضارة الفرعونية بشكل صارخ...وأن انتماءك العلمي تحول من الهواية إلي الاحتراف وأن الانتماء المجازي عبر الزمن لتلك الحضارة الشامخة تحول إلي انتماء حقيقي وكأنك تعيشين في أرجاء الدولة القديمة تتلمسين سبل الحياة بأنامل من ذهب...فتخرج لنا تلك الموضوعات التي تكتبيها بإحساساك في صورة رائعة ومبهرة ومذهلة

غير معرف يقول...

انا شامم ريحه فسيخ! الله لا يسيئكوا اللى يدخل على المدونه ياكل لبان شكلس ويرش شويه كولونيا وكل سنه وانتوا طيبين
دكتور محمد عبد الرزاق

حزنبل وعياله الاربعه (شكولاتس وخوخه وزئرده وميرو) يقول...

صح كلامك ياحزنبل ، هو ده احساسى بالشعب ده ، وفعلا بطوف بخيالى فى أرجاء هذه الحضاره كيف كانت ؟؟؟وكيف قامت ؟؟؟وكيف...وكيف ...وكيف ؟؟؟؟؟لدرجه غبيه جدا.بتخيل نفسى اعيش فى حضارتهم وحقيقى بتعلم منهم

حزنبل وعياله الاربعه (شكولاتس وخوخه وزئرده وميرو) يقول...

كل سنه وانت طيب يادكتور محمد،ديما منورنا والله .....بس حقيقى كنت منتظره منك انك تقولى ياشكولاتس شم النسيم بدعه....لكنك اضحكتنى جدا

Kawthar Y. يقول...

لكن هاد هو شم النسيم!! أنا ما كنت بعرف عنه شي أبداً غير أنه يوم بيحتفلوا فيه وبس
يعطيك العافية عالمجهود الحلو و واضح جداً حبك للهامجال و إبداعك فيه.

حزنبل وعياله الاربعه (شكولاتس وخوخه وزئرده وميرو) يقول...

حقيقى بحبها جدا وبعشق الحضاره دى بشكل خيالى