اثريه ثقافيه

1 مايو 2010

تماثيل الأوشابتي.

انا عارفه انها غيبه طويله .......وزمانكوا نساتوني أصلا....والله الحياه ذي ما إنتوا عارفين مشاغل ....انا عن نفسي بحب التواجد كل يوم بموضوع جديد  لكن اعمل ايه بس ادعولى انتو بس وملكوش دعوه .......بصراحه زميل لى استفزنى بسؤال عن الاوشابتى لقيتها فكره ان اقوم اعمل الموضوع ده  منها ارد للاوشابتى اعتبارها ،غير انكم وحشتونى جدا ....وبصراحه هروب كمان من ابحاثى الخنيقه .....بس ياترى تطلع ايه الاوشابتى دى ؟؟؟؟؟؟وايه الاسم الغريب ده ؟؟؟؟؟ ياترى ليه اتسمت بكده وليه الاسم ده بالذات ؟؟؟؟ماتيجى نعرف اكتر ونشوف ياترى هى كانت بتتباع شكك ولا لا ؟؟؟؟ هههههههههه الفراعنه هيشككوا امال المقايضه كان ليه لوكان بيشكوا اصلا.... حاجه غريبه والله ......ماعلينا تعالوا بينا نتعرف اكثر ........
تماثيل الاوشابتى .
دى تماثيل صغيره جدا ، كان المصرى القديم كان بيحطها فى المقبره علشان تقوم بالاعمال الموكله للمتوفى فى العالم الاخر وبديلا عنه بحيث كانت مجرد تماثيل رمزيه بتقوم فى خدمه المتوفى فى العالم الاخر علشان يقدر يستمتع بحياته فى الحياه الاخره ذى ماكانوا متعودين يعشوها فى الحياه الدنيا.....يعنى من الاخر عشان يأنتخ ويتسلطن ويعيش حياته بالطول والعرض .....ماكنوش يعرفوا ان اخرتهم سودا...
تسميتها .
بعض المؤرخين قالوا ان اسمها ده من اسم الخشب اللى صنعت منه من البدايه والنوع ده من الخشب كان بيسمى " شواب " ، والبعض الاخر قال ان اسمها من الفعل " اوشب " بمعنى يجيب  وان الاسم ده غير مرتبط بالخشب وده لانها صنعت من مواد تانيه ذى القيشانى والفاينس وغيرها من المواد ، وانا اعتقد ان الرأى ده هو الاصح .. واطلق عليها ايضا شابتى ، وشوابتى ، وشبتى .......
ظهورها .
ودى ظهرت فى  مقابر الملوك والافراد من عصر الانتقال الثانى او على الاقل منذ بدايه الدوله الوسطى ولغايه العصر البطلمى ، يعنى كان بيقتصر وجودها بصفه اساسيه فى مقابر الملوك وعليه القوم اللى معاهم فلوس الاغنيه اللى كل الثروات تحت ايديهم يعنى استحاله انهم يخدوا التماثيل شكك واصلا اصلا عمرها ماكانوا بيشتروها لان فنان القصر الملكى هو اللى كان بيقوم بتشكيلها ووضعها داخل المقبره.....
فكرتها .
جت فكرتها من الخدم ومناظر الخدمه اليوميه فى مصر القديمه اللى كانت بتصورها مقابر الدوله القديمه واللى كانت بتمثل مختلف الاعمال والحرف اللى بيؤديها الخدم ضمن نقوش المقبره واللى كان بيحصل عليها المتوفى بطريقه سحريه ....... والظاهر انهم لقوا ان المتوفى احتمال مايستفدشى بالخدمه دى فاستبدلوها بفكره التماثيل الرمزيه واللى كانت بتمثلهم وهويقومون بخدمه المتوفى فى العالم الاخر فيقدر بكده المتوفى يستمتع بحياته فى الحياه الاخرى ذى ما تعودوا عليه فى  حياتهم الدنيا .......
مكانها داخل المقبره .
اختلفت اماكن تواجدها فى المقبره ، مره يلاقوها عند راس المتوفى ، والمره التانيه يلاقوها عند قدمه ، وساعات تانيه داخل تجوفين يمين ويسار جدران حجره الدفن ، او داخل صندوقين او نموذجين من التوابيت الخشبيه ، او مبعثره فى ارضيتها او داخل اناء فخارى .....
اعدادها .
مكنشى فى قاعده ثابته لاعدادها داخل المقبره ، ففى بعض الاحيان كان بيدفن مع المتوفى من الطبقه الراقيه 365تمثالا بعدد ايام السنه ، يعنى كل يوم تمثال يقوم بالخدمه اليوميه ده معقول جدا .....لكن لاقينا ان العدد بيزيد ووصل الى 396 تمثالا ثم الى 400 تمثال فى العصور التاليه ...... ده غير ان مقبره سيتى الاول لقوا بها 700 تمثال ......ملك بقى وعظيم
ومن المفروض ان العدد الفعلى للاوشابتى هو 365 بالاضافه الى 36 مشرفا لصبح الاجمالى 401 تمثالا ومع ذلك كانت هناك حلات كتير مختلفه انا بعتقد ان السر فى زياده العدد ده ان الخدم نفسهم كانوا بيصنعوا ليهم تماثيل اوشابتى والدليل على كلامى ده ان كتير من الاوشابتى دى كان بيبقى مكتوب عليها اسماء مختلفه بالاضافه الى اسم المتوفى داخل المقبره وده علشان يقدروا يقوما بخدمته وتزويده بالعماله الازمه وغيرها فى العالم الاخر ويمكن الفصل بين النوذجين من الاوشابتى فى المقبره اعتمادا على ردائه صنع الثانيه فى المقبره .....
شكلها :
وهى عباره عن تماثيل صغيره بتأخذ شكل المومياء وتتقاطع يدها على الصدر ، وبتمسك باديها ادوات مختله بتعبر عن وظيفتها فى العالم الاخر ...
المواد المصنوعه منها .
تعددت ايضا المواد التى صنعت منها الاوشابتى ، حيث نجد ان هذه التماثيل صنعت من الحجر والخشب والحجر الصوانى ، والفاينس والقيشانى والخزف والبرونز والفخار ......الخ، وكانت تنحت من المواد دى لبطريقه مثاليه وتلون العينان باللون الاسود وحواجبها باللون الاسود ويزين صدرها قلاده مزخرفه وكانت تزين من الامام بسطر رأسى بالهيروغليفيه وده كان بيبقى مكتوب عليها اسم المتوفى او الفصل السادس من كتاب الموتى ....
ده موضوع خفيق وبسيط اتمنى انه يعجبكوا وتقدروا تستفادوا بيه تصبحوا على خير بقى .......وارجع بقى لابحاثى ...
سلااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااااام

هناك 7 تعليقات:

نونا يقول...

الموضوع حلو قوي ومكتوب بإسلوب بسيط وخفيف

د.محمد الشافعي يقول...

دا الواد اسامة دا سره باتع...خلاكي عملت موضوع رائع...وعجبني الأسلوب جداً أكثر من اي شيئ أخر...لكن طبعا الأوشابتي يحتاج لكلام كتير تاني وأنا أعلم أنه لا يخفي عليكي...ولكن ماقدمتيه فيه الكفايه
بارك الله فيكي

حزنبل وعياله الاربعه (شكولاتس وخوخه وزئرده وميرو) يقول...

يعني حاجه كده علي ماأوسم أرد بيها إعتبار الأوشابتي

غير معرف يقول...

ايه الكلام الرائع دة يا قمرى عنجد جامد جدااااااااااا ولله عاوزة مواضيع حلوة كده على طول ربنا يوفقك يا قمرى

حزنبل وعياله الاربعه (شكولاتس وخوخه وزئرده وميرو) يقول...

عن جد إنتي إللي قمر ربنا يكرمك ويوفقك ياأحلي بطوط في الدنيا يارافعه من معنوياتي إن شاء الله في موضوع جامد جدا قريب

غير معرف يقول...

موضوع جديد وجامد وبجد استفدت جدا منه,وعرفت حاجه جديده
تسلمي ياعسلي
سمكه

حزنبل وعياله الاربعه (شكولاتس وخوخه وزئرده وميرو) يقول...

سمكه ياه ياهلا ياهلا عاش من شافك أخير تكرمتي والله وحشتني تعليقاتك