اثريه ثقافيه

7 مارس 2010

الزراعه في مصر القديمه.


وحشتوني جدا حقيقي غيبه طويله بس أعمل إيه حزنبل منكد عليا ...وبصراحه بقالي فتره محتاره بين كام موضوع وكلهم حلوين وعاجبني جدا ....أصل ذي ما إنتوا عارفين انا بعشق الحضاره دي بجنون وعشان كده بحبها قوي وبحب كل موضوعتها وفي موضوعات كده تخليك بجد تفتخر بالحضاره دي ودماغ المصري القديم وتقعد كده تفكر وتستعجب هو بجد قدر يعمل كده إزاي ......شكلي كده بقيت رغايه جدا في الفتره إللي بعدتها عنكم ......المهم ندخل في المفيد انا أخترت ليكوا موضوع "الزراعه المصريه القديمه" عشان تعرفوا إن أقدم الزراعات في العالم القديم هي الزراعه المصريه تصورا بقي...يعني بيرجع تاريخها لعصور بعيده جدا تاريخها منقدرش نحسبه بالقرون ولكن بآلاف السنين ....... غير إن الزراعه إللي إحنا ماشين لسه عليها صوره طبق الأصل للزراعه القديمه .....يلا نتعرف أكتر عن الزراعه وإمتي بدأت ....وإيه فصول الزراعه.... وكمان نعرف الأدوات إللي إستخدموها وساعدتهم وشكلها إيه دي.......


تاريخ الزراعه.
الزراعه واحده من الأساسيات الرئيسيه إللي قامت عليها الحضاره المصريه القديمه منذ أقدم العصور( تقريبا منذ العصر الحجري الحديث) وعشان كده هي أقدم الزراعات في العالم القديم يعني تقدروا تقولوا إن المصريون القدماء مارسوا الزراعه منذ أكتر من سبعه آلاف سنه...... ولولا معرفه الزراعه ما تمكنت مصر من وصلوها إلي كونها أعظم حضارات العالم القديم وطبعا بلا منافس وإللي يقولكوا الصين يبقي مبيعرفش حاجه ممكن يكونوا برعوا بس بعد إيه ، بعد ماخدوا سر الصنعه (علمناهم الشحاته سبقونا ع الأبواب) ده كلام....المهم طبعا المصري القديم معرفش الزراعه كده فجأه لكن قعد الفترات الأولي من حياته قبل مايعرف الزراعه كانت حياته قائمه علي الجمع والإلتقاط ياكل ورق الشجر يقلع جذور النباتات اللي طالعه لوحدها يصطاد طير عزاله سمكه يتنقل من مكان لمكان يدور علي مكان ينام فيه تحت فرع شجره ولا حاجه يعني من الآخر كان عايش علي عاله علي الطبيعه بس الطعام ده مصيره أد إيه والأعداد إللي بتزيد يوم بعد يوم دي هيجبولها أكل منين وطبعا كما نعلم الحاجه هي أم الإختراع والمقوله الشهيره لدينا الجيش قال إتصرف يعني يشغل دماغه ويفكر وفعلا بالملاحظه المستمره لسقوط الحب اللي بينمو بصوره طبيعيه في الطبيعه وإحتفاؤه فتره وظهور نبات كاملا من نفس النوع مره تانيه جعلتها يجرب بنفسه وفعلا أخد بعض الحبوب دي وزرعها فأخرجت نباتا وبدأت معها الزراعه ومنها لإستإناس الحيون وتوالت بعدها الإكتشافات منها النيران وتحولت حياته من إنسان متنقل من مكان لمكان إلي إنسان مستقر حول وادي النيل حيث خصوبه التربه غير إن الزراعه كانت بتعتمد علي نهر النيل.

دور نهر النيل وفضله علي الزراعه.
نهر النيل هو الذي علم الناس الزراعه حيث كان سببا رئيسيا في خصوبه التربه وصلاحيتها للزراعه وعشان كده قدسوه وألهوه في صوره الإله "حابي" وكان يمثل علي هيئه رجل ممتلئ الثدين والبطن أو مخلوق مزدوج يجمع بين الذكوره والآنوثه وكان بيلون في الغالب باللون الأسود أو الأزرق رمز الخصوبه والرخاء وبيحمل الغذاء وخيرات النهر من زهور وطيور وأسماك وبيمسك في يده علامه السنين وهي عباره عن جريده من النخل وإللي بيظهر عليها التدريج نتيجه لكسر أخواصها إللي بتبين أعداد السنين......
وفعلا إرتبطت كل نشاطات المصري القديم بالنيل وفيضانه بحيث قدر يستفيد من مياه النيل بأقصي إستفاده ممكنه وبدأ يشق الترع والقنوات علي جانبي النهر عشان يقدر يوصل المياه إلي أكبر قدر من الأراضي الزراعيه وأشهر دليل علي ده المنظر المصور علي "صلايه نعرمر" هنشوف عليها قيام الملك بشق قناه ، حيث كان نظام الري المتبع في مصر هو ري الحياض وإللي كان بيعتمد علي هذه القنوات والترع والجسور وفي بعض الأحياه كان بيبقي صعب إن المياه بتاعت نهر النيل إنها توصل للأماكن المرتفغه الصالحه للزراعه وعشان كده قدر يبتكر وسائل تساعده علي رفع المياه منها الشادوف وأيضا الساقيه.....آه الساقيه وكمان بتشبه السواقي الموجوده في الريف المصري والدليل في واحده في تونه الجبل ترجع للعصر الأخير من تاريخ مصر الفرعونيه تجلب الماء من عمر يصل إلي 36 م ، واستطاعوا كمان من خلال فيضان النيل قدر يحدد الفصول في مصر القديمه .

فصول الزراعه.
المصري القديم قسم السنه إلي ثلاثه فصول كل فصل منها بيضم أربعه أشهر وكل شهر ثلاثون يوما وكان بيضاف إلي آخر شهر خمسه آيام هم أيام النسيئ واللي كانت بتعتبر أعيادا ليصبح العام 365 يوم وكان بيضيفوا يوما كاملا لكل رابع سنه لتصير 366 يوم
،‏ وكانت فصول السنه هي :_
الفصل الأول "فصل الفيضان" وكان بيسمي في المصريه القديمه"آخت"وكانت شهوره بالقبطيه عن الأصول المصريه كالتالي"توت_بابه_هاتور_كيهيك"
الفصل الثاني "فصل الزراعه" وهو خروج الزرع من الأرض ، وكان يسمي ("برت" وكانت شهوره " طوبه_أمشير_برهمات_برموده)
الفصل الثالث"فصل الصيف" وهو الحصاد وكان يسمي"شمو" وشهوره كانت "(بشونس _بؤونه_أبيب _مسري)
وعلي فكره دي الشهور إللي لسه بيمشي عليها الفلاح المصري.

مراحل الزراعه وأدواتها.
الزراعه في مصر القديمه مرت بالعديد من المراحل وإختار لكل مرحله الأدوات إللي بتتوافق مع طبيعه بيئته وكانت بتبدأ الزراعه في مصر عندما ينتهي موسم الفيضان ، ويبدأ بعد ذلك عمل الفلاح بعد إنحسار مياه الفيضان عن الحقول ويبدأ الفلاح بأول مرحله وهي:_
1-عمليه حرث الأرض.
يعني بيمهد الأرض للزراعه ، يقوم بتفتيت كتل الطمي وتفتيت التربه عشان يعرضها للهوء وأشعه الشمس وتسويتها لبذر البذور وأستعمل ألأبقار والثيران لهذا الغرض وإستخدم المصري القديم في حرث الأرض "الفؤوس الخشبيه القصيره أو المحراث .
2-‏ التسميد.
يمكن الطمي كان كافي جدا لخصوبه التربه لكنهم حاولوا يمدوها بالسماد اللازم عشان المحصول يبقي ميه ميه فإستخدموا ليه روث البهائم لصناعه السماد البلدي.
3‏_العزق.
كان بيستخدم عشان عزق الأرض وتقليبها الفأس وإستخدموا كمان المنجل والمحراث كل العمليات دي كانت كلها عشان تهويه التربه وإعدادها.
4‏_‏ عمليه البذر.
بعد إعداد الأرض وتوضيبها كده بتبدأ عمليه البذر كان كل واحد يشيل سله كده ويعلها في رقبته ويبدأ ببذر البذور بإيده اليمني علي قطعه الأرض المخصصه وبعد عمليها بذر البذور تبدأ غرسها في التربه وكان بيساعدهم في ده قطعان الخراف وساعات الكباش وده صوره داخل المقابر.
5‏_‏ العنايه بالنبات.
بيراعي فيها الفلاح حقله أول مايبدأ إنبات البذور يرويها ويجمع الحشائش الضاره ويروي مزروعاته في مواعيدها المناسبه ويحميها من الحشرات والطيور لغايه ما النبات يكبر ويرعرع حيث يقوم بجني تمار كده وتعبه.
6‏_‏ عمليه الحصاد.
وبعد ما يتم نضج النبات تبدأ معاه عمليه الحصاد ود بيبدأ فيها بقطع السنابل من الخزاء صغيره من السيقان الى مايعلو الركبه وكانوا بيستخدموا المنجل للعمليه دى .
7_عمليه درس المحصول .
بعد حصاده على طول يقوموا مربطينوا فى حزم ويضموا كل حزمتين مع بعض ....عارفين انتو الدراسه اللى بيستخدموها دلوتى وتطورت دى ......كان بيتم نقل المحصول بواسطه الحمير الى المكان المعد للدرس بجوار القريه ده اللى اسمه " الجرن" وده كان عباره عن مكان فسيح ارضه بتبقى ممهد ومجهزه وشكلها بيبقى مستدير ويقوموا فاكين الحزم والسنابل دى وفردينها فى المكان ده وبعدين تساق الابقار او الثيران او الحمير بحيث كانت تساق وتدور فى دائره فوق المحصول فتدوس الحصيد ليتخلص الحب من السنابل ويفصل الحب عن القش.
8-عمليه التذريه .
وتبدا عمليه التذريه بعد درس المحصول ومعناه فصل الحبوب من التبن ودى كانوا بيستخدمولها المذراه ذات الثلاث شعب وكان بيقوم بيها رجلان حيث يقوموا باستخدام المذارى دى اللى بتشبه راحه اليد ثم يميلن بها على المدروس ثم يعتدلن رافعات اذرعهن الى اعلى فيسقط الحب مع التبن الذى يحمله الرياح بعيدا عن الحب.
9- عمليه الغربله.
بعد فصل الحبوب كانت النساء تقوم بتكويم القمح وغربلته بغرابيل مربعه عشان يطمنوا ان على تقنيه التبن ثم عمليه كيل القمح وتسجيله عند كاتب حسابات الغلال.
10- التخزين.
وتنتهى مرحله الزراعه بتخزين الحبوب فى صوامع ودى كانت نوعان واحده على حسب الضياع الكبيره واخرى حسب الضياع الصغيره .......
والجدير بالذكر ان قدماء المصريين قد عرفوا تحميص الحبوب قبل تخزينها وده عشان يطهروها من الحشرات وتخليصها من الرطوبه حتى تعيش فتره طويله دون ان يصيبها العطب.......

اكيد تستعجبون مثلى على مدى روعه الحضاره المصريه ، واد ايه الزراعه كان ليها دور كبير جدا على استقرار المصرى القديم وتكون شخصيته وابداعه فى عدد من المجالات جعلته يبدع ويبدع ويبدع انتظروا مقالى القادم عشان نعرف اكتر عن المحاصيل الى زارعها وتعرفوا بجد كل المحاصيل المعروفه لدينا استفاد بيها المصرى ازاى................

هناك 17 تعليقًا:

سمكه يقول...

عظمه علي عظمه ياست.
ايه العظمه والجمال والروعه دي ياست.انا قولت دكتوره مش ف حد صدقني,
ربنا يحفطك.
سمكه

حزنبل وعياله الاربعه (شكولاتس وخوخه وزئرده وميرو) يقول...

كلموني تاني عنك فكروني صحوا نار الشوق، الشوق في قلبي وفي عيوني
ياه ياسمكه أهو ده زمن الفن الجميل راح وراح أيامه وانا زيه

غير معرف يقول...

الحاجه الجميله زى الشمس والقمر خالده لا تموت لانها تاثيرها بيتحول لاسطوره ينقلها الاحفاد عن الاجداد الى يوم القيامه
ممكن انتى تتحولى لاسطوره بس عاوزه شويه صقل زى الجوهره الثمينه وده حيجى بمرور الوقت واحده واحده ..........
تحياتى يا مبدعه
دكتور محمد عبد الرزاق

حزنبل وعياله الاربعه (شكولاتس وخوخه وزئرده وميرو) يقول...

مش عارفه بصراحه أقولك إيه يلا ربنا يسهل .....بس أكيد المدونه واحشها نقدك حقيقي كان بيعجبني

احمد غباشى يقول...

مبروك المدونه
وحاجه جميله جدا

حزنبل وعياله الاربعه (شكولاتس وخوخه وزئرده وميرو) يقول...

ياااااااااااااااه ده انت قديم قوى ع العموم الله يبارك فيك وشرفت بجد وتعليقك اسعدنى...والمدونه اعتبرها بيتك الثانى....سأنتظر تعليقاتك

حزنبل وعياله الاربعه (شكولاتس وخوخه وزئرده وميرو) يقول...

ياااااااااااااااه ده انت قديم قوى ع العموم الله يبارك فيك وشرفت بجد وتعليقك اسعدنى...والمدونه اعتبرها بيتك الثانى....سأنتظر تعليقاتك

د.محمد الشافعي يقول...

مجهود أكثر من رائع..وعرض مبسط لموضوع صعب ...وكلام مختصر مفهوم..لموضوع طويل وكبير...رائع جدا..ودائماً إلي الأمام

مع تحياتي لصاحب الفضل وراء كل هذا التميز...العزيز باسم

غير معرف يقول...

الفضل الاول طبعا لله سبحانه وتعالى،
ثم طبعا فضل الاب الحنون الى الابنه المجتهده ، حبيبتى التى هى اغلى عندى من نفسى ومايسعدنى دئما نجاحهاوسعادتها
مع خالص تقديرى واحترامى لك
اخوك باسم.

حزنبل وعياله الاربعه (شكولاتس وخوخه وزئرده وميرو) يقول...

خلاص كده هقول ايه
ربنا يخليكوا ليا

د.محمد الشافعي يقول...

طبعاً أخي الكريم الفضل كله لله..ولكن دعني أقول لك...أنه لولا تشجيعك واعتزازك وفرحك بتفوقها..ما كانت استمرت في هذا التألق العمي المتميز..

وأنا مسرور جداً لأني تدثك إليك مباشرة...لأني أحملها السلام لك دائماً...ونلتقي علي خير بإذن الله

د.محمد الشافعي يقول...

أحمد غباشي..الشاب الهادئ المؤدب...تقبل تحياتي..وأشكرك علي حُسن استقبالك لي في مؤتمر جامعة الزقازيق..فأنت بحق نعم الإبن البار...ونعم التلميذ النجيب المحب لأستاذه...فشكراً لك..وتحياتي إلي العزيز سمسم

غير معرف يقول...

شرف ليا ان اقف جنب حبيبتى
وشرف ايضا انك خاطبتنى
وانا سعيد جدا
ويشرفنى جدا ان اتعرف على اخ مثلك
باسم

نفرتيتى يقول...

ربنا يوفقك يارب وتبقى دكتورة اد الدنيا ونفرح بيكى ونفضل ديما نستفيد منك كده علطول فعلا والله معلوماتك بسيطة وحلوة وبالذات الجمل مابين الاقواس

حزنبل وعياله الاربعه (شكولاتس وخوخه وزئرده وميرو) يقول...

والله انتى اللى زى العسل واموره وعسوله
ربنا يكرمك

أحمد الغباشي يحي يقول...

السلام عليكم
حقيقي مجهود أكثر من رائع وأتمني لكي التوفيق وياريت تشكري أستاذي الدكتور محمد الشافعي علي هذا التعليق وأتمني أن أكون عند حسن ظنه كما يقول ، وبعدين يادكتور محمد إحنا عملنا إللي لازم نعمله مع استاذنا ودكتورنا المفضل والمحبب ومره ثانيه ألف شكر يادكتور محمد

Ahmed Diab يقول...

حلم لاح لعين الساهر ... وتهادى في خيال عابر ...وهفى بين سكون الخاطر ... يصل الماضي بيمن الحاضر.
ليس غريباً ان الاجداد عظماء ... لان الاحفاد ايضاً عظماء.
شكراً ياحزنبل يامدرسة وكلية وجامعة في قلب بعض.