اثريه ثقافيه

18 فبراير 2010

توت عنخ آمون (نب خبر رع_ حقا أيون رسي)


النهارده هتكلم عن "توت عنخ آمون" بصراحه لاقيته عليه حوارات وكلام وجدل كبير جدا وضجه غير عاديه وبجد ناس كتير جدا لسه عماله تقطع في فروته وبقي حديث الساعه........ ومش عارفه ليه علي الرغم من وفاته في سن صغير جدا تقريبا وهو سنه في الثامنه عشر ...ولا قاد حروب ومعارك عظيمه تخلد إسمه ولا حاجه ...... ولا إنجازات رائعه مفيش حد من الملوك قام بيها لا قابله ولا بعده...... وده خلاني ابحث عن الراجل ده وكان السؤال إيه سبب الهيصه والدوشه دي كلها؟....... وياتري مين هو الراجل ده وحكايته إيه !!وإيه سبب وفاته!!... وحاجات تانيه كتير..........

توت عنخ آمون.
وده كان واحد من أحد فراعنه الأسره الثامنه عشر في تاريخ مصر القديمه ، وإسمه بيعني "الصوره الحيه للإله آمون هناك عدد من الأقاويل حول نسبه فمنهم من يري أنه إبنا لإخناتون من زوجه ثانويه أو أخ له من والدته "تي" و يقال ان أمه هي (كي أف 35 أي إل) التي لاتزال مجهوله ، وبعضهم يري أنه كان أخا للملك "سمنخ كا رع"الذي حكم بعد إخناتون مباشره حوالي 3 سنوات كده وتوفي وتولي السلطه من بعده "توت عنخ آمون"
ولكن ‏.......
تبين مؤخرا ان الملك ‏‏"توت عنخ آمون هو إبن الملك إخناتون عن طريق تحليل الحامض النووي DNA.

زواجه .
تزوج توت عنخ آمون من إبنه إخناتون الثالثه إللي كان إسمها " عنخ اس ان با آتون " وكان إسمه في الوقت ده "توت عنخ آتون" وكان عمره في الوقت ده تسع سنوات تقريبا وعشان كان صغنون قوي علي عرش البلاد فكان بيساعده علي تصريف شؤن البلاد والد نفرتيتي "آي" الذي كان يطلق عليه الأب الإلهي.

الإنتقال إلي طيبه.
وقعد "توت عنخ آمون" وزوجته حوالي 3 سنين في تل العمارنه وبعد كده سبوها ورجعوا لطيبه تاني ولعباده" الإله آمون" وغير إسمه إلي"توت عنخ آمون" وحذفت زوجته إسم آتون من لقبها وبقي إسمها "عنح إس إن آمون"
وأعاد لمعابد آمون كل ما أخذه أخناتون منها وقام "توت عنخ آمون" بتقديم القرابين للإله "آمون وزوجته موت"وواضح انه ترك تل العمارنه ورجع لطيبه تاني علشان يرضي كهنه آمون وآلهتهم

أعماله داخليا وخارجيا.
في الداخل :_ قام بسلسله من الترميمات والإصلاحات لمعابد آمون وأمر بنقش صوره المعبود آمون بالذهب الخالص، وقام بتزين بهو الأعمده الضخمه في الكرنك وضاعف من أملاك المعابد من الذهب والفضه وزاد عدد الكهنه .
في الخارج:_ قام بحمله إلي آسيا للقضاء علي الآسياويين وقد صور علي قطعه من الذهب وهو يؤدب عدوا قابضا عليه من رأسه .

وفاته.
توفي وهو في ريعان شبابه (ياعيني) وهو سنه تقريبا 18 عاما....... وتعدد الأقاويل والأسباب حول سبب وفاته وبقت مسأله موته مثيره للجدل جدا وبعد ما كانت الدراسات السابقه ترجح ان الملك مات مقتولا بضربه علي مؤخره رأسه إستطاع العلم الحديث وتطور الأجهزه العلميه إثبات خطأ هذا الإحتمال وتم تفسير هذه الفتحه الموجوده بالرأس انها كانت يوضع بها سائل التحنيط ، وتبين بعد الفحص والدراسه إن الملك ده كان عنده قصور في الدوره الدمويه في أنسجه العظام يقال أنه قريب الشبه بمرض إلتواء كوهلر الذي يؤدي إلي إلتواء في العمود الفقري وتبين انه كان أعرج حيث كانت قدمه اليمني مسطحه أما قدمه اليسري فكانت ملتويه وبها إلتهابات في الإصبعين الثاني والثالث والدليل علي الكلام ده هو العثور علي بعض الأدوات في مقبرته يعتقد أنها كانت تفيده في السير كالعصا حيث عثر علي 130 عصا في مقبرته كان يستخدمها في المشي ، بالإضافه إلي أنه كان هنا كسر في الفخذ الأيسر من الواضح انه كان نتيجه لسقوطه من مكان مرتفع او عجلته الحربيه وقيل أنه تزامن من كسر فخذه إصابته بمرض الملاريا عن طريق لدغه بعوضه مماأضعف ذلك جسده فأودي ذلك بحياته.

قصه غريبه حدثت بعد وفاته.
 بعد وفاه " توت عنخ امون " ارسلتزوجته " عنخ اي ان امون " رساله الى مللك الحيثين ( سبو بيلو ليوماس ) االلى كان بيعتبر العدو الاكبر للمصريين ابلغته بوفاه زوجها وطلبت منه ان يرسل لها اميرا عاشان تتزوجه ويكون فرعونا وملكا على مصر وبعد فعلا ما اتاكد من صدق الرساله دى وانها مش مكيده ولا حاجه ارسل احد ابناؤه الامراء لكى يكون ملكا على مصر حسب رغبه الملكه ..............الا ان رجال مصر الاقوياء قامو بقتل الامير وهو فى طريقه ومنعوا حدوث هذه الكارثه .

شهرته .
السبب بقى فى شهره الراجل ده هو اكتشاف مقبرته كامله لم يمسها ايدى الصوص من قبل ….ده اللى ادى الى شغف الكثير من الباحثين فى معرفه قصه الراجل ده والحقيقه عن حياه " توت عنخ امون" واللى اكتشف المقبره دى العالم الاثرى البريطانى هوارد كارتر ، ولورد كارنافون وده عام 1922 م ..

وقد عثر على مقبره الملك ده فى مقبره رقم 62 بوادى الملوك فى مكان مجاور لمقبره الملك رمسيس السادس ، وفتحت رسميا فى 29 نوفمبر عام 1922 ولقو جواها 171 قطعه اثريه ، وعثر على تابوته كاملا وبداخله جثه الملك وكانت مغطاه بلفائف الكتان وعليها القناع الذهبى الخاص بالملك ، والتابوت الذهبى ده كان داخل ثلاث توابيت اخرى كان اكبرهم من الحجر الرملى ، وعلى الجثمان بتاع الملك وجدو باقه من الزهور اللى تركتها زوجته ، وكمان مقاصير بها توابيت تحيط بها الهه حاميات للملك الشاب ودى كانت من الخشب المغطى بالذهب ، بالاضافه الى الاوانى الكانوبيه ودى كان موضوع فيها احشاء الملك كبد وطحال وكده ، واسره من الذهب وعروش وتماثيل واثاث جنزى ونعال واسلحه وكمان لعبه اللى كانت مصنوعه من العاج ، ومن اجمل الاثاث فى المقبره دى عرش الملك اللى زخرف ظهره بمنظر للزوجه " عنخ اس ان با امون" وهى تلمس زوجها بالعطر ، وده كان مكون من الذهب والفضه والعقيق والقيشانى والزجاج الملون ، بالاضافه الى تصوير المللك على اثاثه الجنزى وهو فى رحله صيد ومناظر للحيونات مثل الاسود والاوز البرى والنعام………………الخ.

متصورين تلك الثوره الهائله اللى عثر عليها فى مقبره ملك لا يتجاوز عمره العشرون ؟؟؟؟؟مش فعلا حاجه تستحق الاثاره والجدل والبحث عن تاريخه ؟؟؟؟؟؟؟


بس ياترى لو كانت مقبره لملك عمره تجاوز السبعين وقاد من الجولات والحروب والانجازات فى حياته؟؟؟؟؟؟؟؟ياترى مقبرته كان شكلها هيبقى ازاى ؟؟؟؟؟؟؟


مش حقيقى لو لم تمتد يد اللصوص الى تلك الموروث الثقافى التاريخه لعرفنا الكثير والكثبر عن عظمه الحضاره المصريه؟؟؟؟؟؟

هناك 13 تعليقًا:

حزنبل وعياله الاربعه (شكولاتس وخوخه وزئرده وميرو) يقول...

أكد زاهي حواس رئيس المجلس المصري الأعلى للآثار أن "الملك توت عنخ آمون مات بالملاريا" الذي تنقله حشرة البعوض ولم يقتل ولم يصب في "حادث إصابة قاتلة"، وفقا للنتائج التي توصل إليها فريق من الباحثين الذين قاموا على مدار عامين بتحليل الحمض النووي للملك الشاب وعائلته من المومياوات.

واستعرض حواس في مؤتمر صحافي عالمي حضرته حشود من وسائل الإعلام العربية والعالمية ظهر أمس بالمتحف المصري في القاهرة نتائج التحاليل ، قائلا إن النتائج المعلنة اليوم تعد الأبرز عن الفرعون الشاب بعد خبر اكتشاف المومياء الخاصة به.

[الملك توت عنخ آمون. (أ.ف.ب) ]
الملك توت عنخ آمون. (أ.ف.ب)

وكشف التحليل بشكل حاسم أن توت عنخ آمون هو ابن الملك اخناتون فرعون التوحيد وأن جده هو أمنحوتب الثالث وجدته هي الملكة تي ابنة الملكين يويا وتويا وأقوى نساء عصرها.ونفت الأبحاث ما تم ترويجه طويلا حول كون الملك توت عنخ آمون "شاذا" وأثبتت أنه مصاب بعيوب خلقية نتيجة زواج أبيه الملك إخناتون من أخته.
نقلا عن
http://www.alriyadh.com/article499616.html

فاطمه يقول...

ده نعتبروا سبق صحفي !اهتمامك بالملك توت عنخ أمون وسرد حكياته من الالف للياء والربط بين السابق والحاضر كل ده امتعني جدا وسهل جدا وده مش جديد علي مدونتك الرائعه تمنياتي لكي بمزيد من التقدم والنجاح.

حزنبل وعياله الاربعه (شكولاتس وخوخه وزئرده وميرو) يقول...

ميرسي ليكي يابطوط وعلي كلامك الرقيق وعلي متابعتك مدونتي

غير معرف يقول...

مدوته شكولاتس هى اله زمن تبحر بكم فى عباب التاريخ وترسو فى جزرها وتقطف من حدائق تلك الجزر زهور الحكمه والعبر
فالف تحيه لمدونه شكولاتس
دكتور محمد عبد الرزاق

حزنبل وعياله الاربعه (شكولاتس وخوخه وزئرده وميرو) يقول...

ده إيه الرضا ده

د.محمد الشافعي يقول...

الله ينور عليكي ويبارك فيكي

حزنبل وعياله الاربعه (شكولاتس وخوخه وزئرده وميرو) يقول...

ياهلا ياهلا
آخيرا رضيت عني ما إنت عارف معرفش أشتغل في موضوع جديد من غير تعليقك

غير معرف يقول...

ايه اللى حصل يا شكولاتس ؟
وقفتى عن الكتابه ليه ؟
دكتور محمد عبد الرزاق

حزنبل وعياله الاربعه (شكولاتس وخوخه وزئرده وميرو) يقول...

لم أتوقف بس واضح إن مأرور عليا محتاره في أكتر من موضوع ومنشغله بعمل عدد من الأبحاث دي كل الحكايه
شكرا ليك علي إهتمامك وإن شاء الله قريبا جدا موضوع جديد

حزنبل يقول...

فينك وفين موضوعاتك

وحشنا كلامك

حزنبل

حزنبل وعياله الاربعه (شكولاتس وخوخه وزئرده وميرو) يقول...

المالكه مش حاضره اليومين دول بس بحاول

سمكه يقول...

حبيبتي خوخه وحشتيني جدا جدا جدا ووحشتني المدونه قوي, واول مادخلت عليها وشوفت موضوعاتك الكتيره عرفت اني قصرت ف حقك كتير بس ف نفس الوقت اطمنت ع مستقبلك انك هتبقي دكتوره أثار مصري مشهور ع مستوي العالم,وبكره تشوفي.
بجد موضوع اكثر من رائع وبرافوا عليك انا كنت محتاجه اقرأ عن الموضوع ده,
اسفي كتير ليكي ع التأخير بس ياروحي انت عارفه ظروفي.
دايما ف تقدم مستمر وربنا يحميكي يارب ويحفظك.
اختك سمكه

حزنبل وعياله الاربعه (شكولاتس وخوخه وزئرده وميرو) يقول...

آمين يارب العالمين ...ربنا يكرمك ويخليكي ....إيه يابنتي الكلام الجامد ده ميه ميه ياسمكه