اثريه ثقافيه

5 يناير، 2010

الخط الديموطيقي والقبطي.


أولا :_ الخط الديموطيقي .


أما النوع الثالث للكتابه المصريه القديمه كان الخط الديموطيقي وعلي فكره الخط ده تطور للخطين الهيروغليفي والهيراطيقي ..... لكن السؤال الملح بضم الميم ديما ليه الراجل ده لجأ لخط ثالت مش التاني كان سريع وبن ناس.....بصوا هو لجأ ليه عشان لاقاه أسرع السريع لما توصل لإختراعه لقي أنه في هناك سهوله كبيره جدا في التدوين وبالتالي كان بيقدر ينجز شغله وعمله في وقت أقل عن إستخدامه للخط الهيراطيقي مش بذمتكوا الراجل ده دماغ.
بصراحه انا ما درستش الخط ده خلال سنوات دراستي في الجامعه لكن كوني دارس أوباحث للآثار والحضاره المصريه لازم أعرف معلومات عنه ، يعني شكلي هيبقي وحش قوي لو لقيت برديه أو قطعه حجريه مكتوبه بالخط الديموطيقي ويسألوني عنها وأقول أصل مدرستهاش في الجامعه، وعلي فكره الخط الديموطيقي ده كان واحد من الخطوط الثلاثه إللي كانت منقوشه علي "حجر رشيد" هبقي أكلمكوا عن الحجر ده بعدين .....المهم شوفتوا إزاي إن إحنا ضروري جدا إن يكون عندنا خلفيه عنه.


التسميه.
كلمه "ديموطيقي" تعني حرفيا الخط الشعبي الذي أشتق من من الكلمه اليونانيه "ديموس"نسبه إلي ديموتيكوس والتي تعني شعبي .... طبعا هتسألوا ليه إشمعنا شعبي ...."_.طب ليه الأغاني الشعبيه بيسموها كده مش عشان كلامها بسيط ومتتداول وكل الناس بتقولوا وسريعه الإنتشار فاكرين طبعا أغنيه شعبان عبد الرحيم "هبطل السجاير وأكون إنسان جديد من أول يناير هروح أشيل حديد وإييييييه"_ أعتقد إن الإغنيه باللحن بتاعها لسه محفوظ وساعات الناس بتغنيه........ عشان كده المصري القديم لما لقي الخط الديموطيقي سريع جدا ومختصر جدا الشعب العادي إللي هما العامه إستخدموه في كتابه اللغه المتداوله فيما بينهم في حياتهم ومعاملاتهم اليوميه وعشان العامه"الشعب يعني" كانوا أكتر ناس بيستخدموا الخط ده سموه الخط الشعبي.


شكله
الديموطيقي يبدو من شكله كتابه سريعه بخطوط مائله ومختصره غايه الإختصار.
كان يكتب الخط الديموطيقي علي أوراق البردي والإستروكا(الشقافه).


ظهوره.
الخط الديموطيقي ده ظهر منذ القرن الثامن قبل الميلاد وإذدهر في أواخر الأسره الخامسه والعشرون وأوائل الأسره السادسه والعشرين وإستمر حتي القرن الخامس الميلادي يعني الناس دول إستخدمه الخط ده خلال الفترات دي.
والسبب في ظهور الخط ده هو تعدد الأنشطه عند المصري القديم وكثره المعاملات بصفه خاصه الشئون الإداريه إللي ديما بتحتاج سرعه لإنجازها.


ثانيا :_الخط القبطي.

ده بقي آخر خطوط الغه المصريه القديمه
والخط ده كان عباره عن الخط الديموطيقي مكتوب بحروف يونانيه وإضيف إليه سبع أصوات أوحروف مش موجوده باللغه اليونانيه ولكنها إتخدت من الخط الديموطيقي..........لكن السؤال المحير هو ليه إختار اللغه اليونانيه دي وأضاف عليها سبع علامات بس من الديموطيقي؟؟؟؟.....سؤال محير فعلا ......لكن نقدر نقول إنه إستخدم اللغه اليونانيه عشان الغزاه اليونانين دخلوا مصر في الفتره دي ، وعشان يقدر يتفاهم مع اليونانيين إختار الأبجديه اليونانيه ومن نحيه تانيه علشان يثبت إن الخط القبطي ده هو إللي إللي وضع بداياته أضاف ليه 7 علامات من الخط الديموطيقي ويقول للعالم كله والأجيال إللي هتيجي من بعده إن التطور ده نابع عن لغته "اللغه المصريه القديمه وخطوطها .


التسميه.
كلمه قبطي مشتقه من اليونانيه"إيجوبتي" وتعني مصري إشاره إلي المواطن الذي عاش علي أرض مصر وإلي الكتابه إللي عبرت عن لغته خلال هذا الوقت.
ظهورها.
ظهر الخط القبطي منذ بدايه القرن الثالث الميلادي تقريبا ولازالت هذه اللغه مستخدمه حتي الآن في الكنائس والأديره وقد حلت اللغه العربيه محلها بالتدريج منذ الفتح الإسلامي لمصر عام 640 م
وبكده نكون نهينا حديثنا عن اللغه المصريه القديمه إنتظروا الأساسيات الخاصه بقواعدها.

هناك 4 تعليقات:

hozonbl يقول...

رائع والله...بس نفسي نخرج شوية من اللغة ومشتقاتها ونروح نزور الآثار..يعني الهرم...المعابد..وداي الملوك..الأقصر..الكرنك..الحاجات المدهشة دي

حزنبل وعياله الاربعه (شكولاتس وخوخه وزئرده وميرو) يقول...

مستعجل ليه ياحزنبل هشرح بس القواعد اساسيتهاومش هجيب سيره اللغه تانى بس عشان نبقى خلصنا منها خالص وياريت تقولى نفسك نبدأ بايه بعد القواعد اوعدك الهرم الأكبر

ورده يقول...

حلوه قوي الفكره وجميله قوي المدونه ممتعه بجد

حزنبل وعياله الاربعه (شكولاتس وخوخه وزئرده وميرو) يقول...

انتى اللى حلوه ياحلى ورده سانتظر تعلقاتك دوما