اثريه ثقافيه

10 يناير، 2010

ورق البردي وسر صناعته.

في المقال إللي فات عرفنا إزاي الناس المفرعنين دول قدروا إنهم يستغلوا كل جزء وفتفوته في هذا النبات ،وعرفنا إنه قدر يصنع منه المراكب الحصير السلال الصناديق المناضد الصنادل وكان بيستخدم الجذور كنوع من الوقود غير أنه كان غذاء لعامه الشعب لكن الإستحدام الأكثر أهميه كان ورق البردي وأكيد ناس كتير بتسأل هما بجد قدروا إزاي يعملوا ورق يكتبوا عليه من نبات ذي ده ........



سر صناعه ورق البردي.
هتسألوني ليه بقول سر .....لإن المصريون القدماء إللي كانوا بيسجلوا كل تصرفات حياتهم اليوميه ......وتركوا لنا الكثير والكثير من البرديات والنصوص لما يتركوا لنا ما يدل علي كيفيه صناعه البردي .......علشان ورق البردي ده كان ذو أهميه قصوي انا بعتقد إن المصريين حبوا إن تكون طريقه إنتاجه محاطه بالكتمان علشان يتميزوا به دون غيرهم .........
عرفنا إزاي بقي طريقه صناعه البردي من خلال التجارب حيث توصل الباحثون إلي الطريقه التي كان يصنع بها البردي ........
ويمكن أن نلخص الطريقه التي إستخدمها قدماء المصرين في صنع ورق البردي كالتالي:_
كانوا بيقطعوا سيقان نبات البردي وهي خضراء إلي أطوال مناسبه (أد بعضها) ويقومون بنزع القشره الخضرا دي متصورين معايا عارفين عود القصب... كانوا بقي بينزعوا القشره الخضرا إللي بره دي واللب الداخلي كان بيقطع إلي شرائح رقيقه وبعدين يخدوا الشرائح دي ويحطوها علي قطعه قماش يرصوها كده جنب بعضها متوازيه أفقيه وبعدين يروصوا مجموعه فوقها بحيث تكون عموديه عليها ، وبعد كده كانت تطرق (يدقوها يعني) بمطرقه خشبيه طرقا خفيفا علشان الشرائح دي المكونه للورقه تتداخل مع بعضها وبعدين يغطوها لبعض الوقت عشان تفقد الميه الموجوده فيها وبعدها يخدوها يحطوها تحت مكبس صغير أو أحجار ثقيله لساعات طويله علشان الشرائح دي تتداخل مع بعضها كويس قوي وتتماسك مع بعضها وتصبح صفحه من ورق البردي ثم تصقل بعد كده صقلا جيدا (يصنفروها يعني) عشان سطح الورقه يبقي ناعم ويبقي جاهز للكتابه عليه.



ظهوره وإختفاؤه.
لا يعرف علي وجهه التحديد التاريخ الذي بدأت فيه صناعه ورق البردي ، ولكن يرجح انه ظهر في أوائل القرن 30 ق.م والدليل علي كده إنهم عثروا علي ملف صغير من البردي غير مكتوب عليه في مقبره"حماكا" يرجع إلي عصر الأسره الأولي ، وموجود في المتحف المصري وثائق صغيره من البردي ترجع لعصر الأسرتين الخامسه والسادسه ، وعثر مؤخرا علي عشر وثائق أخري ترجع لعصر الأسره السادسه في الجبلين.
وظل المصريون القدماء يحتكرون صناعه ورق البردي وتصديره إلي دول العالم القديم لمده تزيد إلي ثلاث آلاف عام ، وعشان كده ظهرت محاولات عديده لإنتاج بدائل لأوراق البردي في دول العالم القديم ولكن كلها كانت دون مستوي أوراق البردي حتي جاء القرن العاشر وإستطاع العرب نقل طريقه صناعه أوراق أخف من ورق البردي وكانت هذه الأوراق أسهل في صناعتها وأقل تكلفه فبدأوا يهملون زراعه البردي بالتدريج وبعد عده قرون إختفي من الساحه المصريه تماما.



يااااااااه بجد علي ذكاء المصري القديم قدروا يستفادوا من نبات ينمو في المستنقعات ليس في إستخدام واحد ففط بل كم هائل من الإستخدامات نجدهم كانوا يزرعونه ويأكلون جذوره وقلب سيقانه أويدخلونها في مصنوعاتهم فيضفرون منها أخذيه وصنادل للكهنه أو يفتلونها حبالا أو يصنعونها ورق .......إلخ



الله عليكي يا أعظم حضاره وعلي عبقريتك أيها المصري القديم

هناك 5 تعليقات:

حوده يقول...

المدونه أكثر من رائعه

Dr.el-shafey يقول...

أنا فخور بيكي جداً...

دا أولاً...

ثم أين موقع الحضارة الصينية التي سبقت الجميع بما فيهم مصر فيصناعة الورق والأحبار...أرجو عدم التحيز لحضارة دون أخري...وطبعاً مصر حضارة عظيمة وعظيمة جدا ..لكن هناك أيضا جهود بشرية لايمكن إنكارها أو إغفالها...خالص تحياتي لكي ولمدونتك الرائعة..والتي ولدت عملاقة

حزنبل وعياله الاربعه (شكولاتس وخوخه وزئرده وميرو) يقول...

بصراحه لم اقرأ ابد عن الحضاره الصينيه ولا اعلم الى اى مدى نجحت هذا الحضاره ولكن اعلم جيدا ان الحضاره المصريه كانت سباقه دئما وبرعت فى كل المجالات وارى ان السبق الاول لها فاذا كانت الحضاره الصينيه قد سبقت مصر فى صناعه الورق والاحبار فالسبق والرياده للحضاره المصريه فى تعليمهم مجرد التفكير نفسه فى صناعته

نهال يقول...

هايل الموضوع حلو قوى

حزنبل وعياله الاربعه (شكولاتس وخوخه وزئرده وميرو) يقول...

وحشانى يالوله والله وياريت تتكرر زيارتك تانى