اثريه ثقافيه

2 يناير، 2010

الخط الهيراطيقي

ده تاني الخطوط إللي إتكتبت بيها اللغه المصريه القديمه وأكيد بتسألوا طبعا ليه الناس دول لجأوا لخط تاني يزهقونا بيه وإحنا خلصنا من الأولاني الهيروغليفي يعني لما يخترعولنا واحد تاني........ انا هقولكوا ليه....... بس ياتري لسه فاكرين لما كنا في المدرسه وإحنا صغيرين كان في كده كتاب إسمه الخط العربي .... انا عارفه إن عندكوا زهايمر ومش فاكرين ماعلينا انا فاكره الكتاب ده كان بيبقي مكتوب فيه أكتب مره بخط النسخ ومره بخط الرقعه......أهو ده بقي خط الرقعه عند المصري القديم إللي معظمنا بيستخدمه علشان يكتب بسرعه وفعلا بدل ما يقعد يرسم البطه والوزه والإيد والرجل بكامل التفاصيل إستطاع إن يعبر عنها بشكل مختصر مجرد رموز بسيطه مبسطه عن الخط الهيروغليفي الأصلي ونتج عنه الخط ده .
يعني نقدر نقول إن الخط الهيراطيقي هو تبسيط للخط الهيروغلي أو بمعني آخر هو إختصار له.


التسميه
كلمه هيراطقي دي تعني حرفيا الكتابه المقدسه أوخط رجال الدين طبعا هتقولولي ليه ..... لإن الكهنه زمان داخل المعابد كانوا أكثر ناس بيستخدموا الخط ده بدليل إنهم عثروا (لقوا يعني ) عدد كبير جدا من النصوص الدينيه مكتوبه بالخط الهيراطيقي ومعظمها كتب بواسطه الكهنه
وكلمه هيراطيقي دي إشتقت من الكلمه اليونانيه "هيراطيقوس" والتي تعني كهنوتي بردوا عشان كان الخط المستخدم بواسطه الكهنه
إستخدامه .
إستعمل الخط الهيراطيقي ده في مصر القديمه لمده تقرب من 200 سنه من الأسرات الأولي وحتي عصر الدوله الحديثه وقد إستخدمه المصري القديم لانه خط سريع يقدر يساعده في الأغراض العمليه كما أنه كان بيتناسب جدا مع طبيعه النصوص الدينيه وكمان الدنيويه إللي زادت مع إزدياد حركه الحياه عنده وده زي النصوص المتصله بالشؤن التجاريه .


شكلها
الكتابه دي تغلب علي شكلها التشبيك (بمعني العلامات الهيراطيقه دي مربوطه ببعضها البعض وهي في أغلب الأمر ممدوده) ذي الإنجليزي الأمريكاني كده كل الحروف لازقه في في بعضها
أما عن إتجاه الكتابه فهي عاده من اليمين إلي اليسار وكانت تكتب في سطور عموديه حتي عصر الدوله الوسطي مطوليه كده جنب بعضها وبعد كده كتب بالتدريج في سطور أفقيه من اليمين إلي اليسار.
وكان يكتب علي أوراق البردي ذي الرقع الجلديه كده أو الإستروكا(الشقافات) إللي هو يعني كسر الفخار وكان بيستخدم عود رفيع من الغاب إللي هو البوص ليه سنن مدبب يغمس في حبر أسود وأحمر
وكان بيستخدم اللون الأحمر في كتابه العناوين وأسماء الألهه الشريره والأعداد الرقميه ده المصري القديم ده دماغ كان بيشكل علشان يطلع شغله آخر تمام.


يعني نقدر نقول إن الخط ده المصري القديم إخترعه عشان الهيروغليفي كان متعب بس في المده إللي بيقدر ينجزه فيها وعشان يتناسب مع سرعه وتطور حياته .

هناك 8 تعليقات:

موئه يقول...

هايل ياميرو ممتع قوي وشيق جدا

حزنبل يقول...

الله عليكي ....السهل الممتنع

حزنبل وعياله الاربعه (شكولاتس وخوخه وزئرده وميرو) يقول...

إيه ياموئه الكلام الجامد ده ربنا يخليكي ليا إبقي زورينا ديما ياقمر

حزنبل وعياله الاربعه (شكولاتس وخوخه وزئرده وميرو) يقول...

آه ياحزنبل سهل ممتنع مش كان نفسك تعرف الخط الهيراطيقي شوف بقي مين الأسهل الهيروغليفي ولا الهيراطيقي انا شايفه إن الإتنين واحد بس الهيروغليفي أسهل علشان علاماته التصوريه إللي هي شكلها واضحه وجميله وبنت ناس لكن الهيراطيقي زي ماقولت سهل ممتنع خلصنا من الرسومات الغريبه وبسطهلنا وبقت سهله صحيح لكن في بعض الأحيان بتبقي معقده بس حاول تركز معاها وإنت تحبها ياحزنبوله وماتخدش الأمور أفش كده من أولها

غير معرف يقول...

هايل الموضوعات خفيفه ولذيذه ربنا يوفقك
نونا

prof m.z يقول...

والله ده كلام زي الفل والواحد ما بيزهقش من الحاكايات الجميلة دي
واصلي الكتابة انتي بس متزهقيش

ومستني زيارتك لمدونتي

http://sehatak.blogspot.com/

حزنبل وعياله الاربعه (شكولاتس وخوخه وزئرده وميرو) يقول...

الله يخليك prof m.Z ‎‏ وميرسي قوي لتشريفك مدونتي وصدقني عمري ماهزهق طول ما أنتوا ورايا بدعموني وبتشجعوني بتعليقاتكم فضلا عن إن الحضاره المصريه كلها غايه في التشويق والمتعه
ويشرفني جدا إن أزور مدونتك

غير معرف يقول...

شكرا جدا وجزاك الله كل الخير انا طالبة اثار واستفدت جدا من المعلومات الجميلة دي