اثريه ثقافيه

24 يناير، 2010

تل العمارنه وآثاره.


ودي بقي "آخت آتون "إللي خوتكوا بيها في المقالات إللي فاتت وإللي أسسها ملك التوحيد الآتوني"إخناتون" وذلك بعد ماترك عباده الآلهه المتعدده هو وعائله وتركه لكهنه ومعابد آمون في طيبه إللي رفضوا فكره " الإله آتون" فسابلهم البلد بإللي فيها وراح مكان جديد خالص لافيه آمون ولا رع ولا أي إله خالص علشان يبدأ نشر دعوته بعيد عن وجع الدماغ ده لا كهنه يثيروا ضده ولا عباده لإله تاني فأختار أرض بكر كده وجديده خالص لم يدنسها أي دين أوعباده قبل كده يعني إختار المكان ده علشان لقاه مناسب لنشر دعوته وسماه "آخت آتون" لكن انا بقول تل العمارنه تعالوا بقي نعرف إيه سبب تسميتها بكده ....وياتري موقعها فين دي!!! ....وياتري الراجل "إخناتون" ده سابلينا فيها آثار!!! وياتري لسه موجوده.... تعالوا بقي نعرف قصتها ......


التسميه.
كلمه العمارنه هي جمع عمران وهو كان إسم قبيله عربيه جت سكنت المنطقه دي منذ مطلع القرن الثامن عشر يعني سموها كده نسبه إلي قبيله بني عمران اللي عاشت في المنطقه دي
أما إسمها المصري القديم فكان "آخت آتون" او أفق(مشرق) آتون .


الموقع.
تقع تل العمارنه دي علي بعد 12 كم جنوب مدينه ملوي بمحافظه المنيا وعلي بعد 45 كم جنوب مقابر بني حسن ولسه بقايا المدينه دي موجوده .


آثارها.
لو زورنا تل العمارنه هنلاقي لسه بقايا العاصمه الجديده "آخت آتون"اللى اسسها زمان " اخناتون" تشهد علي هجر أصحابها لها بقصورها ومعابدها إللي كانت مكرسه لآتون ورسومات أرضيتها وجدرانها الملونه بأشكال للطيور والأسماك والحيوانات والحدائق والبحيرات كما تشق المدينه بشوارع متسعه أقيمت حولها البحيرات والحدائق ومعابد آتون اللي كانت مميزه بالسقف المفتوح وإللي كان بيتجه الملك من خلاله في إتجاه قرص الشمس والسماء علشان يتعبد بصلوات علي هيئه أناشيد دينيه ...
كما نحتت في سفح الجبل مقابر للأشراف والموظفين ولعل من أهم هذه المقابر:_

* مقبره حيا.
وده كان المشرف علي الحريم الملكي ومقبرته كانت بتضم عدد من المناظر الهامه كانت أهما المناظر التي تمثل إخناتون وزوجته و أمه الملكه"تي" وهم يتناولون الطعام.




*‏ مقبره مري رع .
كان ساقي القصر الملكي وأيضا كان مشرفا علي حريم القصر الملكي وتعتبر من أهم المناظر التي كانت تضمها هذه المقبره تصوير إخناتون وزوجته ومن خلفه بناته السته ورجاله ليتسلم الجزيه من الشعوب الأجنبيه وكان بيظهر من خلالها أيضا كبار المسؤلين إللي بيقدموا وفود الشعوب الأجنبيه مثل مندوبي النوبه وكوش إللي قاموا بجلب العبيد والآسري وعلي فكره النقش ده كان يمثل الجزيه المقدمه من البلاد الآسيويه وسكان جزر بحر إيجه.
‏*مقبره بانحسي.
علي الرغم من إن صاحب المقبره ده كان من النوبه قدر يحصل علي مركز قائد الشرطه وكان رجل دين كمان وكانت مقبرته واحده من المقابر الجميله إللي مازالت تحتفظ بألوان نقوشها .
وبعد أجزاء من المقبره دي إستخدمها في العصر المسيحي لإن بنشوف من خلالها إن فيها جزء كبير من جدارها الشمال تم تحويله إلي كنيسه مسيحيه.
‏*مقبره إيبي.
وده كان كاتب ملكي ومقبرته لم يكتمل بناؤها ولكن من أهم المناظر في مقبرته دي منظر بيمثل الملك إخناتون وزوجته نفرتيتي يقدمان قربان عباره عن وعائين للعطور ويظهر خلفهم بناتهم وهم يلعبن بالصلاصيل أمام مائده قرابين.

‏*وحفرت إلي الشرق من هذه المقابر مقبره للملك وعائلته حيث دفنت إبنته "مكت آتون"التي توفيت أثناء حياته .

* وشرق المدينه يوجد مبني لحفظ المراسلات (وهو مايعرف بأرشيف العمارنه) عثر عليه عام 1887 م وبه العديد من لوحات الطمي(الرقم الطمييه )المجففه كان مكتوب عليها بالمسماريه والأكاديه (البابليه)كانت تضم نحو 337 رساله وبعد دراستها تبين أنها تظهر لنا علاقه مصر بأملاكها في آسيا بصفه خاصه في سوريا وفلسطين وبابل فضلا عن إستغاثات من ملوك سوريا للحاكم المصري لإنقاذهم من الفتن والثورات بالمنطقه ولكن لم تلقي هذه الرسائل أي إجابه (نفضلها يعني) حيث شيد حول المدينه اللوحات حيث شيد نحو 14 لوحه وأقسم أنه لم يترك حدود مدينته وإنه سيبقي بها بقيه حياته .
ومن آثارها أيضا:_

*القصر الشمالي.
وإللي أمر ببناء هذا القصر إخناتون في شمال المدينه ولكن للآسف لايتبقي سوي أطلاله ومن خلالها عرفنا منها إن القصر ده كان بيحتوي علي بحيره صغيره وحديقه حيوان وكانت جدران القصر ده مزينه بلوحات ملونه لسه بقاياها موجوده داخل حجرات القصر وكان القصر ده كان مشيد بالطوب اللبن وكان بيضم قاعه للإستقبال وحمام سباحه وإسطبل للخيول.
‏ ‏*محاجر العمارنه.
وتضم هذه المحاجر عده كتابات كتبت باللغه المصريه تعود لهد بعد الملوك الفراعين ذي خوفو وبيبي الأول والتاني ...


ولكن للأسف دمرت المدينه وجميع الآثار التي تخص إخناتون وعائلته وإشير إلي عهده الملكي "بسنوات الخارج " أو "المهرطق " حيث أطلق كهنه آمون عليه إسم المارق أو الملحد " وبدأ الإضهاد لإخناتون بصفه خاصه منذ عهد "حور محب" فقام بتدمير أسماؤه الملكيه وصوره وأزيلت أيضا أسماء الإله "آتون" التي كانت مدونه داخل خراطيش ملكيه من كل مكان وجدت به وهجرت المدينه بعد تدميرها وعادت الأمور كما كانت عليه وعاد خليفته "توت عنخ آمون" زوج إبنته إلي العاصمه الأصليه طيبه ........

هناك 9 تعليقات:

Dr.el-shafey يقول...

من احب الأماكن التي زرتها في حياتي ..منطقة تل العمارنة ..بمعابدها وقصورها...علي الرغم من صعوبة الوصول إليها..لأنها بعيدة عن مدينة إلمنيا...ولازم تروحيها بالمركب...بس بيبقي يوم رائع...زي يوم بني حسن والأشمونين وتونة الجبل والبهنسا وجبل الطير وغيرها من آثار إلمنيا

حزنبل وعياله الاربعه (شكولاتس وخوخه وزئرده وميرو) يقول...

تشوقت إلي رؤيتها من كلامك عنها وطبعا بحسدك لزيارها لإني رأيت جمالها الفعلي من خلال كلماتك ..... وفي نفس اللحظه جعلتني أندم علي سوء حظي لعدم الذهاب إليها وتمنيت أن يعود بي الزمن مره آخري لأذهب إليها .... لأري جمالها بعيني ...لعل الحظ يحالفني مره آخري .

سمكه يقول...

جميل جدا الموضوع انت دقيقه جدا ف اختيارك للمواضيع بجد انا اتشوقت ازور المكان من كلامك و من الصور.
كل يوم في تقدم رائع ياميرو
سمكه

حزنبل وعياله الاربعه (شكولاتس وخوخه وزئرده وميرو) يقول...

إبقي إعزميني بقي أروح معاكي فاهمه طبعا...
بجد انا كمان نفسي أروحها بجد بلدنا حلوه قوي وفيها أماكن روعه
مكان ذي ده نادر جدا بجماله بطبيعته بآثاره
ياااااه ياسمكه أد إيه ساحر وجذاب.

غير معرف يقول...

الصعيد ساحر بجبله الذى يشرف على الخضره ومياه النيل المتدفقه ويحتضنهما كما يحتضن الزمان مصر وترى ثلاث لوحات بثلاث صفات لاهل الصعيد قساوه الجبل وخصوبه الطين وكرم النيل هذا الصعيد المظلوم الان كان واهب الرجال لمصر فى زمن المحن ومنه خرجت حركات التحرير ضد الغزاه
ان يوم شتاء استمتع فيه بشمس الصعيد فى مركب نيلى احب الى مكسب يوم عمل كامل
دكتور محمد عبد الرزاق

حزنبل وعياله الاربعه (شكولاتس وخوخه وزئرده وميرو) يقول...

كلام جميل جدا
وشكرا لحضرتك علي متابعتك مدونتني

غير معرف يقول...

انا لا اتابع الا المتميزين وشخصتيك المتميزه واضحه جدا فى مدوناتك رغم انى طبعا اختلف معاكى فى بعض الاراء مثل عشقك الكبير للفراعنه ودفاعك المستميت عنهم لكن المهم انك عندك مبدا وهدف مش انسانه فارغه وتافهه حيث ان الفراغ والتافاهه شعار الزمن اللى احنا فيه زمن الروشنه الطحن ! المهم استمرى فى عملك المخلص ( والاخلاص صفه جميله جدا وواضح ان عندك منها كتير ) والى الامام دائما .... وفقك الله
دكتور محمد عبد الرزاق

حزنبل وعياله الاربعه (شكولاتس وخوخه وزئرده وميرو) يقول...

كلك ذوق
وميرسي ليك علي كلماتك الرقيقه لي

وليدعثمان حسانين يقول...

أنا وليد من تل العمارنة للإفاده أكثر عن هذه المدينة المنسية أرجو المراسلة